Buraxılış yekun dövlət attestasiyası
Bakalavriatı bitirən tələbələr ixtisas-peşə hazırlığı fənlərindən yazılı-şifahi dövlət imtahanı verir. Suallar STCW Konvensiyasının istismar və idarəetmə səviyyələrinə uyğundur, nəticə 100 ballıq şkala ilə qiymətləndirilir.
- FormaYazılı-şifahi imtahan
- Suallar5 nəzəri və 1 praktiki
- Keçid balı51 (100 baldan)
Buraxılış yekun dövlət attestasiyası təhsil proqramının mənimsənilmə səviyyəsini müəyyən etmək və məzuna ixtisas dərəcəsi vermək üçün keçirilir. Qaydalar «Təhsil haqqında» Qanuna, bakalavr pilləsində dövlət attestasiyası haqqında əsasnaməyə və STCW-78 Konvensiyasının A-II/1, A-II/2, A-III/1, A-III/2, A-III/6, A-III/7 bölmələrinin tələblərinə əsaslanır.
Kimlər buraxılır
Təhsil proqramının bütün tələblərini yerinə yetirmiş, tədris planındakı fənlər və təcrübələr üzrə kreditləri toplamış tələbələr. İmtahanın proqramı və qiymətləndirmə qaydası Elmi Şurada təsdiq olunur və attestasiyanın başlamasından ən azı 4 ay əvvəl tələbələrə çatdırılır. İmtahan suallarına dair məsləhət saatlarını ixtisas kafedraları keçirir.
İmtahan necə keçirilir
- İmtahan yazılı-şifahi qaydada, ixtisas-peşə hazırlığı fənlərindən keçirilir; elektron və distant forma qadağandır.
- Tələbəyə 5 nəzəri sual (istismar səviyyəsi, STCW A-II/1, A-III/1, A-III/6) və 1 praktiki tapşırıq (idarəetmə səviyyəsi, A-II/2, A-III/2, A-III/6) verilir.
- Hər nəzəri sual 15 bala, praktiki tapşırıq 25 bala qədər qiymətləndirilir. Nəzəri suallardan 26 baldan az toplayan tələbə növbəti mərhələyə buraxılmır.
- Attestasiyadan keçmək üçün ən azı 51 bal toplamaq lazımdır. Nəticələr imtahan günü elan olunur.
- İmtahanda rabitə vasitələrindən istifadə qəti qadağandır; qadağan olunmuş vasitə aşkar edilərsə akt tərtib olunur və «qeyri-kafi» qiymət verilir.
İmtahan günü
- İmtahanın yerini və vaxtını ixtisas kafedraları müəyyən edir; məlumat imtahana ən azı 5 gün qalmış saytda yerləşdirilir.
- Tələbə imtahana şəxsiyyət vəsiqəsi və qiymət kitabçası ilə gəlir.
- İmtahan iki mərhələdə keçirilir: əvvəlcə auditoriyada nəzəri suallar (istismar səviyyəsi), günün ikinci yarısında trenajor otağında və ya laboratoriyada praktiki sual (idarəetmə səviyyəsi). «Gəmiqayırma və gəmi təmiri» ixtisası üzrə imtahan bir mərhələdə keçirilə bilər.
- Nəzəri və praktiki suallara aid biletlər eyni nömrə ilə işarələnir; praktiki biletlər o vaxtadək möhürlənmiş zərflərdə saxlanılır. Praktiki sualın yerinə yetirilməsi üçün 25 dəqiqəyə qədər vaxt verilir.
- Auditoriyada eyni vaxtda 2 tələbədən çox olmur; DAK gün ərzində 10 nəfərdən çox tələbədən imtahan qəbul etmir.
- Qaydalar pozulduqda DAK akt tərtib edir və tələbənin imtahan nəticəsi ləğv olunur.
Ətraflı: «Buraxılış yekun dövlət attestasiyasının (dövlət imtahanının) keçirilməsi qaydaları» (ADDA-TL-018).
Qiymətləndirmə şkalası
| Bal | Qiymət |
|---|---|
| 91–100 | əla (A) |
| 81–90 | çox yaxşı (B) |
| 71–80 | yaxşı (C) |
| 61–70 | qənaətbəxş (D) |
| 51–60 | kafi (E) |
| 51-dən aşağı | qeyri-kafi (F) |
Dövlət Attestasiya Komissiyası
- İmtahanı hər ixtisas üzrə Dövlət Attestasiya Komissiyası (DAK) aparır. Sədri Akademiyada işləməyən yüksək ixtisaslı mütəxəssislər arasından, ardıcıl 3 ildən çox olmamaq şərti ilə Akademiyanın təqdimatı əsasında ASCO təyin edir.
- Komissiyaya Akademiyanın elmi-pedaqoji heyəti və sahənin aparıcı mütəxəssisləri (ən azı 4 nəfər) daxildir; tərkibi rektor təsdiq edir, səlahiyyət müddəti bir təqvim ilidir.
- Qərarlar üzvlərin üçdə ikisi (sədr mütləq) iştirak etdikdə sadə səs çoxluğu ilə qəbul olunur; səslər bərabər olduqda sədrin səsi həlledicidir.
Nəticədən narazılıq
Tələbə nəticədən narazıdırsa, nəticələrin elanından sonra 1 iş günü ərzində rektora ərizə ilə müraciət edə bilər. Müraciətə rektorun tapşırığı ilə DAK tələbənin iştirakı ilə yenidən baxır.
Diplom və fərqlənmə diplomu
DAK-ın qərarı ilə məzuna ixtisas dərəcəsi, ali təhsil haqqında diplom və diploma əlavə verilir. Fərqlənmə diplomu üçün: bütün fənlərdən və təcrübədən qiymət 71-dən az olmamalı, «C» və «B» qiymətləri bütün qiymətlərin 25 faizindən çox olmamalı, imtahanlarda yalnız «A», «B», «C», yekun attestasiyada isə yalnız «A» alınmalıdır.
Təkrar iştirak
- Üzrlü səbəbdən iştirak etməyən tələbə DAK-ın fəaliyyəti dövründə bir dəfə pulsuz attestasiyadan keçə bilər.
- İştirak etməyən və ya «qeyri-kafi» alan tələbəyə arayış verilir; o, növbəti 4 təqvim ili ərzində iki dəfə yekun attestasiyada iştirak edə bilər. Ödəniş həmin il üçün təhsil haqqının 60-a bölünüb attestasiyanın kreditlərinə vurulması ilə hesablanır.